PROPOSITIONS NECESSAIRES
pour la seureté & garde de cette Ville de Paris.

Les Bourgeois estans en armes depuis plus de deux mois
en ça, sans que la pluspart des Colonels & Capitaines
ayent fait faire l’exercice à leurs Compagnies, pour
n’en auoir eux mesmes la connoissance, & pour n’en
auoir iamais fait aucune profession ; Il est absolument
necessaire de créer pour le temps present seulement, &
sans tirer à consequence pour l’auenir, vn Capitaine
Major à chaque Colonnelle, & vn Lieutenant Major à chaque Compagnie,
exercez au faict de la guerre, qui seront choisis, si faire se peut, des
mesmes Colonnelles & Compagnies, sinon pris ailleurs, s’il ne s’y en
trouue de capables, & soudoyez raisonnablement, lesquels Capitaines &
Lieutenans Majors, feront faire l’exercice deux fois la semaine à diuers
iours, pour éuiter la confusion, & dans les places publiques, ausquels
exercices les anciens Officiers assisteront pour s’instruire. Sera pareillement
creé vn Major general sur toutes les Colonnelles, lequel aura l’œil à
tout ce qui s’y fera, & sera de grande experience au faict de la guerre, &
aura auec les Capitaines Majors mesme pouuoir & authorité aux deliberations
qui seront faites en l’Hostel de Ville & ailleurs qu’ont les Colonnels,
l’execution desquelles deliberations sera faite de l’ordre du general
Major, lequel assistera à tous les armemens de la Bourgeoisie, pour les sorties
qui seront faites, & pour les entreprises ausquelles la Bourgeoisie sera
employée.

Et parce qu’il y a des Colonnels & Capitaines qui sont suspects au public,
pour estre interessez au Party contraire, & par plusieurs autres considerations
qui sont connuës, l’estat au vray en sera fait, & auec vne plaine
connoissance de cause, ceux qui seront destituables pour des iustes considerations,
le seront par effet, & les autres qui sont moins suspects seront
priez de ne faire aucunes fonctions de leurs Charges pendant ces troubles,
lesquelles seront cependant exercées par commission par lesdits Capitaines
& Lieutenans Majors, mais à l’esgard de ceux qui seront iustement
destituez, il sera pourueu en leur lieu dés à present de personnes de
probité & de capacité requise.

Outre la garde ordinaire, & l’employ extraordinaire des armes des

-- 4 --

Bourgeois de Paris aux occasions, les Colonnels Capitaines Majors, Capitaines
Lieutenans Majors & autres Officiers chacun dans l’estenduë de
sa Compagnie, auec six des principaux & notables Bourgeois de la mesme
Compagnie, feront vne visite tres exacte tous les huict iours, ou du
moins de quinze en quinze iours dans les maisons de leurs quartiers, &
dans tous les lieux & endroits d’icelles, & feront leurs procez verbaux,
contenant les noms, l’âge, & l’employ des particuliers qui s’y trouueront,
& le temps qu’ils y sont, comme aussi les armes & prouisions de
guerre & de bouche qui y peuuent estre, & le bled & la farine qui seront
trouuez ausdites maisons en trop grande abondance, & au dela de ce qui
leur est necessaire pour subsister auec leurs familles pendant deux mois,
seront portez en vn ou plusieurs Magazins publics, distribuez & employez
aux necessitez publiques, sur le prix qui en sera fait, duquel les
particuliers seront rembourcez à concurrence du bled & de la farine
qu’on leur aura tres-iustement osté, ce qui sera tres exactement obserué
en toutes les maisons, & particulierement en celles des gens d’affaires, &
Partisans, & des autres personnes suspectes, dont partie se sont retirées
auec l’ennemy, & les armes & prouisions de guerre qui seront trouuées
aux maisons des Partisans & gens suspects, outre ce qui leur est necessaire
pour la garde, à quoy ils sont obligez, sera porté en vn Magazin public,
pour y estre conserué, ou pour s’en seruir aux occasions, apres que le tout
aura esté estimé.

 

Le mesme sera obserué tres exactement en toutes les maisons des
Monasteres & Communautez, & en celles des gens d’Eglise, afin que sous
pretexte de pieté, le grand nombre d’espions & de factieux soient esloignez,
& que la seureté publique se rencontre toute entiere.

La garde des portes, & autres lieux de cette Ville de Paris, sera doublée
durant quinze iours, & les Officiers en auront vn soing particulier
& tres-exact, sans permettre la sortie d’aucunes Armes, Cheuaux, Carosses,
Charettes, ny aucunes hardes, & les Moulins qui sont autour de
cette Ville de Paris, comme importans à la necessité publique, seront
gardez, & plusieurs sentinelles mises au delà desdits Moulins, afin que les
Corps de garde qui y seront puissent estre aduertis des entreprises que les
ennemis pourroient faire sur les Moulins, & par eux, les Corps de garde
des Faux-bourgs & de la Ville les plus prochains, qui auront ordre de les
ayder de certain nombre de Soldats, sans dégarnir leurs Corps de garde,
afin que les entreprises & violences des ennemis puissent estre plus facilement
repoussées & éludées.

Les Officiers & Soldats qui seront en garde, tant en la Ville qu’au
Faux-bourgs, obserueront ceux qui y entrent, s’informeront de leur qualité
& condition ; & du lieu où ils se retirent, se saisiront des armes qu’ils

-- 5 --

portent, & enuoyeront quelque temps apres des Officiers & Soldats en
petit nombre aux maisons qui leur auront esté indiquées, pour sçauoir si
ce que ces particuliers qui sont entrez en la Ville ou Faux bourgs leurs
ont dit est veritable, & en cas de supposition, sera faite vne exacte recherche
en tous les endroits de la Ville & Faux bourgs, pour les trouuer, &
punir capitalement comme espions, comme aussi ceux qui les auront retirez
& recelez, à ces fins, à l’égard des Hostelleries, Cabarets, & Chambres
locantes, deffenses seront faites à tous Hosteliers, Cabaretiers, &
Chambrelans, de retirer de nouueau en leurs maisons aucun particulier,
s’ils n’en ont le pouuoir, par l’ordre & le billet qui en aura esté donné par
le Capitaine ou Lieutenant Major en garde, deuëment signé, qu’ils seront
tenus representer quand ils en seront requis.