XIV.

Celuy qui veut estre Monarque vnniuersel, & auoir
la Seigneurie de l’Europe proteste par ce dessein là
publiquement, & veut que tout le monde le croye
qu’il procure & recherche par toutes voyes possibles,
que tous les Roys, tous les Princes, toutes les Republiques
deuiennent ses sujets, & par consequent
que tous les Royaumes tant par succession comme electif,
que tous les Potentats vassaux où Sauuerains ;
que toutes Republiques, que toutes les villes & peuples
libres de l’Europe & vniuersellement que toutes
les dominations, autres que la sienne soient détruites.

Quand les Romains ont assuiety l’Vniuers, ils

-- 14 --

en ont ainsi vsé, & les Roys ausquels ils ont laissé le
nom, n’ont esté que des petits estaffiers des Procõsuls
iusques à ce qu’enfin le nõ de Roy & la dignité
se soient tout à fait perdus ; C’est la pratique de
tous les Monarques Vniuersels ; Les Espagnols
voulans la Monarchie de l’Europe proposent de
faire des Roys & princes Souuerains comme ils
ont fait de ceux des Indes, des Roys de Naples, Sicile ;
Portugal. Ils s’imaginent d’enuoyer aux plus
florissantes Prouinces des Vice-Roys, qui de trois
en trois ans emportent en Espagne les despoüilles
des Nations, auec des Eloges cõme celuy du Duc
d’Ossonne, qui erigent és villes plus florisantes
des trophées comme ceux du Duc d’Albes en Anuers :
auec des inscriptions du Comte de Fuentes
au Milanois, & autres semblables, qui doute de
cette verité n’a point de sentiment & renonce au
sens commun.