LES VERITEZ
DE MAZARIN
DESCOVVERTES.

AMY Lecteur, tout ainsi qu’en l’ancien Testament
nous lisons qu’vn Isaac, Iacob & autres ont esté la
figure de Iesus-Christ, à cause de leur grande innocẽce
& leur eminente saincteté ; de mesme, ie croy
auec raison que l’Ante-Christ qui est opposé en
tout à Iesus-Christ, doit estre figuré auant qu’il paroisse sur la terre
par quelque mauuais garniement, & quelque personne abominable,
qui nous represente sa malice qui doit estre dans le dernier
degré. Or parce que iusques à present dans la suite de tous
les siecles passez, nous ne voyons point qu’aucune personne aye
esté remplie d’vne assez grande meschanceté pour nous le figurer ;
c’est pourquoy nous ne pouuons pas asseurer que la representation
& le modele de ce scelerat aye paru dans aucun des siecles
qui se sont escoulez. Ce signe fatal estoit reserué pour nous, &
cette Commette, presage du plus grand mal de tous les maux, deuoit
paroistre dessus nos testes pour escarter tous nos plaisirs, &
ne nous faire esperer à l’aduenir que de sinistres & funestes euenements.
Que si enfin, amy Lecteur, tu m’obliges à te dire qui est
celuy-là, de quelle contrée, si c’est vn homme, vn diable, ou quelque
monstre espouuantable ? Pour te mettre hors de peine ie te répondray
en vn mot que c’est Mazarin, cét infame ; que c’est vn
Sicilicien ; que c’est vn homme en apparence, mais vn demon &
vn diable en effet. Ie te diray que c’est veritablement vn monstre,
puis qu’il est composé de parties qui n’ont aucun rapport les vnes
auec les autres ; puis qu’il est vn amas & vn assemblage de tous les
vices, & puis qu’il est contre le dessein & l’intention de la nature.
C’est celuy-là mesme qui est la figure de l’Ante-christ ; tu croiras

-- 3 --

que ce que ie te dis sont impostures, mais prends garde à ce qui
s’enfuit, & sans douter tu en tomberas d’accord auec moy. On dit
de l’Ante-christ, qu’il doit r’enfermer en soy tous les defauts &
toutes les iniquitez de tous ceux qui l’auront precedé ; qu’il doit
troubler tous les Estats du monde, & apporter de la confusion par
tout ; qu’il doit abolir les Loix, tous les Statuts, & étouffer la Religion.
Et qui plus est, qu’il doit faire condescendre la plus grande
partie des hommes à le suiure, par ses menaces & rigueurs. D’où
vient que l’Escriture mesme s’en estonnant, dit que bien-heureux
seront ceux-là qui ne seront pas pour lors sur la terre, & qui ne
verront pas tous ces desordres. Cela estant veritable de l’Antechrist,
& vn article de Foy, où trouuerons-nous sa figure, puisque
ces siecles passez n’ont pas esté assez mal-heureux que de l’auoir
produite ; peut-estre que la fin du monde s’approchant ; Dieu permettra
qu’elle paroistra pour espouuanter les hommes, pour les
faire r’entrer en eux-mesmes, & pour les aduertir de faire leur salut ?
Mais non, cela n’est pas ; la Sicile l’a engendré, & quelque
vent d’Aquilon, nonobstant tous les flots qui vouloient & qui
deuoient l’engloutir, l’a fait aborder à nostre France, où elle a desia
monstré ce qu’elle est, & ce que ie t’ay proposé : Tu m’entends
assez, il n’est pas besoin de m’expliquer, puisque tu es tesmoin oculaire
de ses degats, & que tu as ressenty toy-mesme les effets de sa
tyrannie. Ie ne veux pas nommer personne, c’est Mazarin, c’est
cét eminent Cardinal tout empourpré de nostre sang, si ce n’est
que ie vueille dire que cette escarlatte marque desia les feux d’Enfer
où il doit estre bien-tost precipité. C’est luy que ie soustiens
estre la figure de l’Ante-christ, ie le iustifie. Car s’il est vray que
l’Ante-christ doit estre vn abbregé de tous les vices, & de toutes
les iniquitez ; ie puis dire que Iules est l’iniquité mesme. Auparauant
qu’il fust arriué en France, on viuoit à la Cour auec toute
franchise, auec honneur, & on ne s’estoit iamais laissé emporter
aux excez du ieu, & de toutes les autres desbauches ; la pudicité
des Dames y auoit esté obseruée, & iamais aucun Seigneur
n’y auoit trouué son mal-heur : il n’y a que depuis qu’il y est arriué
que tout ce bel ordre a esté renuersé ; C’est luy qui a fait que tout
le monde y a esté suspect ; C’est luy-mesme qui y a introduit les
excez ; C’est luy qui est cause que les meilleures & les plus anciennes

-- 4 --

familles du Royaume s’y sont ruinées ; C’est luy qui a fourbé
tant de Seigneurs, qui n’ayants pas encore descouuerts ses fraudes,
procedoient auec luy en gens d’honneur, comme c’est le propre
des François : Et non seulement il a infecté la Cour de son venin,
mais encore tout le reste de la France ; Car de grace, qui est
celuy qui auoit iamais entendu parler qu’en France les enleuements
fussent permis, que les viols, les vols, & les massacres y fussent
authorisez, sinon depuis que ce perfide à commencé à la regir,
personne asseurement. Deplus, l’Ante-christ doit ietter la
terreur & l’estonnement dans les cœurs de tout le monde ; il doit
ruiner tous les Estats, & les reünir a son authorité ; il doit se faire
adorer, & mettre bas la Religion : Mais qu’est-ce qu’à voulu faire
ce Mazarin, sinon de faire en sorte qu’on le reuerast comme vne
Diuinité, sinon qu’on luy donnast de l’encens, preferant son interest
à celuy-là de Dieu mesme ? n’a-il pas troublé ce noble Estat,
ne vouloit-il pas le gouuerner absolument, ne s’est-il pas mocqué
de nostre Religion, en mes-vsant des Benefices, & les employant
pour entretenir ses desbauches ? Si le temps me le permettoit, &
si ie ne craignois de t’estre importun, amy Lecteur, ie te descrirois
amplement son humeur, mais ie crois que tu es assez persuadé
qu’il est la figure de l’Ante-christ. Au reste, i’ay composé ce
petit discours pour que tu loües Dieu de ce qu’il est hors de Paris,
& le prie qu’il luy plaise l’enuoyer hors de France ; de peur
qu’ayant commencé à la corrompre, il ne la ruine tout à fait.

 

FIN.