LES PARTICVLARITEZ DE
ce qui s’est passé en l’Assemblée de
la Ville, pour l’Election de Monsieur
de Brusselles à la charge de
Preuost des Marchands, le sixiéme
Iuillet 1652.

Nos souhaits & nos esperances ont enfin
atteint leur but, & ceux que nous
auons tant de fois demandé au Ciel,
pour nous proteger contre l’oppression du
tyran Mazarin, viennent de receuoir la recompense
de leur vertu, & de ce zelle
qu’ils ont fait voir en tant de rencontres
pour nostre defense. Ie parle de ces deux zelateurs
du bien public Monsieur le Duc de
Beaufort, & Monsieur de Brusselles, qui ont
éprouuez les premiers les effets de la malveillance
& cruauté de ce perfide Ministre, l’vn
par la captiuité de quatre ans qu’il a injustement
soufferte & l’autre par ce fameux attentat
commis contre sa personne au mois

-- 4 --

d’Aoust 1648. ces deux grands Hommes dignes
des plus hautes charges de l’Estat, ont
enfin (apres plusieurs remises) esté choisis,
l’vn pour Gouuerneur de cette Ville, & l’autre
pour Preuost des Marchands, en cette
sorte.

 

L’Assemblée de Ville ayant esté conuoquée
le quatriesme de ce mois & plusieurs
notables Pourgeois tant de l’vn que de
l’autre party s’y estant rencontrez, aussi bien
que Son Altesse Royale, & Messieurs
les Princes, l’affaire de l’vnion de la
Ville auec Messieurs les Princes fut mise en
deliberation, ou apres plusieurs aduis, Messieurs
les Princes ne voulant empescher par
leur presence la liberté des suffrages, sortirent
assez mecontens de l’Hostel de Ville ; ce
qui ayant esté apperçeu par la populace qui
estoit dans la place, le desordre dont vous
auez eu le recit fut excité, & chacun s’écriant
qu’il falloit l’vnion, & que les Gouuerneur
& Magistrats fussent changez, & en
suitte le feu ayant esté mis aux portes de
l’Hostel de Ville, l’vnion fut signée de la
pluspart des Deputez de l’Assemblée. Pour
laquelle confirmer, aussi bien que proceder

-- 5 --

à l’Election d’vn nouueau Preuost des Marchands,
Sadite Altesse Royale & Messieurs
les Princes conuoquerent derechef l’Assemblée
des Escheuins, Quarteniers, Diziniers
& notables Bourgeois, à l’apresdinée du sixiesme
de ce mois ; mais plusieurs ayans fait
difficulté de s’y trouuer, pour la crainte d’vn
desordre pareil à celuy qui estoit arriué quelques
iours auparauant, Sadite Altesse Royale
leur fit donner asseurance qu’elle pouruoiroit
à la seureté de l’Assemblée, en forte que
tous auroient leurs suffrages libres, ce qui
ayant esté executé, & de plusieurs compagnies
de Bourgeois qui estoient sous les armes,
s’estans saisis de toutes les auenues de la
place de Greve, & mesme Monsieur le Duc
de Beaufort avant pris le soin de faire retirer
toute la populace, & canaille qui estoit assemblée
en ladite Place ; lesdits sieurs Escheuins,
Quarteniers, Conseillers de Ville &
notables Bourgeois, se rendirent à l’Hostel
de Ville, où se trouuerent aussi Messieurs les
Prince de Condé & Duc de Beaufort : &
apres les voix recueillies par vn des Quarteniers
nommé à cét effet à quatre fois differentes,
le nombre desquelles se trouua le plus

-- 6 --

fort pour Monsieur maistre Pierre de Brusselles,
Conseller du Roy en sa Cour de Parlement,
& grande Chambre, ledit sieur de
Brusselles fut éleu pour faire cy apres les fonctions
de ladite charge, de laquelle ce Sage
Senateur s’estant plusieurs fois excusé, tant
pour son aage, que pour d’autres raisons que
la modestie luy fit alleguer, il fut toutefois
obligé de l’accepter, au grand contentement
de toute l’Assemblée, à laquelle il presta en
suitte le serment, & le receut pareillement
des Escheuins, & autres Officiers de Ville.

 

La nouuelle de cette Election, dont le
bruit a répandu la ioye dans tous les endroits
de cette Ville, fut portée à son Altesse Royale,
qui estoit demeurée en son Palais d’Orleans,
& qui la receust auec vn plaisir extréme,
ce que voulant temoigner elle le rendit
en la Maison de Ville afin d’agréer ladite élection,
ce qu’a fait aussi Monsieur le Prince de
Condé. Quant aux Escheuins, il n’y en a
eu aucun de changé, le temps de leur charge
deuant expirer auant six semaines, & tous
ayans temoignez receuoir tant de satisfaction
de l’Election dudit sieur de Brusselles,
que nous pouuons esperer qu’ils regleront

-- 7 --

routes leurs resolutions sur celles de ce sage
& prudent Magistrat.

 

FIN.