LES LAMENTATIONS
Mazarines.

1. Recordare Domine quod acciderit nobis, intuere
& vide opprobrium nostrum.

1. Souuenez vous Sire du malheur qui nous est arriué
voyez les affronts que nous receuons de iour
en iour, estant contraints mesme de coucher dehors
parce qu’on nous refuse l’entrée dans vos meilleures
villes.

2. Hæreditas nostra versa est ad alienos, domus nostræ
ad extraneos.

2. Nous auons iusques icy possedé comme vn heritage,
les gouuernements, offices, charges, le reuenu
mesme du Domaine, Tailles, Imposts, Aydes Subsides
&c & tout va estre renuersé ou passer en autres
mains, nos maisons mesmes sont pillées par les
Estrangers & demolies par nos ennemis.

3. Pupilli facti sumus sine patre, matres nostre quasi
viduæ

3. Nous allons demeurer comme des orphelins perdãt
le pere de la Maltore, Car nous voyons bien qu’il faut
de necessité qu’il face Iules desloge & nos Meres, les
grosses fermes vont estre comme des nourrisses seiches.

4. A quam nostram pecunta bibimus lignum nostrum argento
emimus.

4. Nous auons fait comme les fils des Prestres qui

-- 4 --

mangent leur pain blanc le premier, nous auions pris
plus d’Impots sur le vin qu’il ne vaut & maintenant on
nous refuse vn verre d’eau, ne nous voulant pas loger
pour nostre argent on nous fait visage de bois,
& ceux qui sont les plus forts nous prennent nostre
argent & nous chassent apres a coups de batton.

 

5. Persecuti sunt nos inimici nostri, laborauimus & Requiem
non habuimus.

5. Depuis qu’on s’en est voulu prendre aux Princes
& aux Parlements nos affaires n’ont pas bien esté
nous les auons trauaillés, & ils nous ont bien trauailés
aussi, & ny les vns ny les autres n’auons eu de repos.

6. Manus nestras tetendimus ad Ægyptios & Assyrios
vi saturati essemus pane.

6. Pour nous rendre Maistres du Parlement & des
Parisiens, nous auons appellé à nostre secours les Polonois
les Crauates & les Suedois, & nous sommes
à la veille de leur aller demander du pain apres auoir
fait manger celuy de nos compatriotes à ces
Estrangers.

7. Patres nostri peccauerunt & non sunt & nos iniquitates
eorum portauimus.

7. Le desordre qui se trouue maintenant dans l’Estat
est artiué par la faute de nos deuanciers. Les vns
l’ont fait les autres l’ont enduré, & maintenant nous
patissons à raison de la malice des vns & de la sottise
des autres, & nous faudra payer pour tous les deux.

8. Serui dominati sunt super nos & nemo ex eorum manibus
liberauit.

-- 5 --

8. Tel nous doit qui nous demande, ceux qui nous
craignoient nous menaçent & ceux qui nous promettoient
monts & merueilles esperant quelque recompense
voyant la foiblesse de nostre party nous
tournent le dos.

9. Panem nostrum cum vitæ diserimine duximus propter
gladium in deserto.

9. Nous auons empesché qu’on n’amenast le pain
à Paris & auons fait deffendre d’y en apporter sur
peine de la vie. Maintenant nous sommes mal venus
par tout, & pour sauuer nostre vie il nous faudra
demeurer incognito dans les villes ou bien aller
habiter les deserts.

10. Principes manu istorum suspenduntur facies senum
non afficiuntur honore.

10. On menace de prendre celuy qui est Prince de
l’Eglise, & de luy faire le mesme traittement qu’a vn
de ses Lieutenants lequel à esté depuis peu pendu
& puis bruslé en Greue pour Sodomie.

11. Cessat gaudium animi nostri, conuertitur in luctum
chorus noster.

11. La fortune cette ennemie des longues prosperitez
à tourné la rouë, nous allons estre aussi bas que
nous estions esleuez, Nous n’auons ni bien ni joye
pensant qu’on nous faira danser sous la corde quelque
bransle Mazarin.

12. Cecidit corona capitis nostri : væ nobis quia peccauimus.

12. La Couronne que nous auions mise sur nostre

-- 6 --

teste est cheutte : nostre authorité, & nos finances
vont à vau-leau. Malheur sur nous qui auons manqué
nostre coup, & n’auons pas assez tost poursuiui
celuy lequel a maintenant des forces plus qu’il n’en
faut pour nous destruire.

 

13. Propterea languet cor nostrum & obtenebrati sunt oculi.

13. A cause de tous ces maux que nous souffrons
nous sommes bien tristes quoy que nous ayons plus
de courage ou de volonté à faire du mal que de forces
pour executer nos desseins qui nous reüsissent si
mal qu’on peut dire que nostre Politique est borgne
ou du tout aueugle.

14. Tu autem Domine in aternum manes, solium tuum
in generationem.

14. En tout cas Sire vous ne pouuez rien perdre &
prenant nostre party vous pouuez beaucoup gaigner
on n’abbettra point vostre trone quand mesme la
victoire iroit du costé des ennemis, & si elle se range
du nostre tout ce qu’il y a de beau & de bon dans le
Royaume sera à nous.

15. Quare in æternum obliuisceris nobis, derelinqueres nos
quamdiu erunt longa tempora.

15. Nous auons toutte nostre confiance en vous Sire,
car si vous n’estiez nostre protecteur, & que la Iustice
nous fit mettre la main au collet nous serions
perdus, mais vous ne nous abandonnerez iamais sinon
que vous ne puissiez plus nous retenir.

16. Conuerte nos Domine ad te & conuertemur, renoua
dies nostros sicut in diebus antiquis.

-- 7 --

16. Sire tournez vous tousiours de nostre costé, &
nous serons du vostre, faites en sorte de remettre toutes
les Tailles, Aydes, Subsides & comme elles ont esté
depuis vingt ans.

17. Numquid derelinqueres nos & offeruescerat in nos
ira tua.

17. Dieu nous enuoye la mort plustost (quoy que
le plus tard qu’il voudra) que de vous dessiller les yeux
pour faire connoistre la mauuaise conduitte de vostre
gouuernement, car vous nous chastiriez & vostre colere
vengeroit les maux que vostre peuple à souffert
souffre & souffrira.