LES AVENTVRES D’VN VALLET
de Chambre enuoyé par son Maistre faire
compliment à vne Dame de
sainct Germain.

 

DEPVIS que i’ay quitté Paris
En pleurs, se sont changez mes ris,
Parce que i’ay quitté voisine
Femme de belle & bonne mine,
Et qui receuoit tous mes vœux
A peu prés ainsi que ie veux :
Iugez par là si son absence
Me cause petite souffrance ?
Mais le grief de mon amour,
Lors que ie seray de retour,
Ie ne puis receuoir ma perte
A l’enseigne de la Croix verte.
Que faire Arrest point de bonheur,
Qui ne soit suiuy de malheur,
Ainsi l’on veoid en toute sorte
Les espines auec les rozes :

-- 4 --

Dame ! patience au besoin
De me guairir prendre le soin :
Preparez-vous dõc dés cette heure
A rire pendant que ie pleure,
Car dans ce bizarre narré,
Si vostre esprit n’est esgaré,
Vous trouuerez vne auanture
La plus droolle de la nature.
Ie fut prié dernierement
D’aller trouuer ciuilement
Vne qui a nom Magdelaine,
Ce que ie promis à grand peine,
Du matin ie vay promptement
M’aquiter de ce compliment :
Car quand on est en ord passage,
qui plus-tost sort estre plus sage.
D’abord que ie fut introduit
A la porte sans faire bruit,
Dans le beau milieu de la chambre
I’apperceus vn viel pot de chambre,
Si plain que par dessus les bords,
Il regorgeoit iusques dehors,
Non pas que ce fut de l’vrine,
C’estoit ma foy de la plus fine :
Tesmoing mon miserable né
A qui tel maux sont destinez.

-- 5 --

Item dans l’air vne chemise
Me donna bien autre surprise,
A sa quantité de couleurs,
Ie la pris pour Tabis à fleurs :
Ie vis de plus vne Cassette,
D’où l’on auoit mis sur toilette
Des Pomades, & des Vnguents,
Du Blanc, du Vermillon, des gands,
Des eaües par Alambicq tirées,
Des Pastes, des Toilles cirées,
Et dans vn trébuchet sans poids
Ie vis du Lierre, des Pois,
Quatre dents d’Yuoire, ou de Cire
Que le soir sans douleur on tire.
Tout contre vn grand placard de plomb
Estoit attaché de son long,
Sur l’espaule d’vn corps de Iuppe
Qui sers à surprendre la duppe.
Souuent ne se deffant point
Du Cauteleur, ou en bon point,
Applaudit par fois la Bossue,
Sur sa taille dont elle sue.
Bref dans ce vilain nid à Rats,
Ie découury plus de fatrats
Qu’il n’en sort d’vne gibecierre,
Dont on amuse le vulgaire.

-- 6 --

Par ce crotesque erorement
Iugez de mon estonnement :
Dont ie concluds que telles Fées
Qui sont le iour si bien coeffées,
Et dont les corps sont enrichis,
Ne sont que Sepulchres blanchis.
Cher amy par mon imprudence
I’abuse de ta patience,
Et puis de plus il se faict tard,
I’ay someil, bon soir Dieu te gard,
Si i’ay bien peu de faire rire,
Ma foy tant mieux, sinon tant pire.

 

FIN.