LE FESTIN DES PARTISANS,
aduancé par le Chancelier auant son depart,
Chef & Protecteür de la Maltoste.
CE fatal ennemy de l’Estat, mon cher amy &
confident de la cabale Partisane le M. pour
consoler & réjouïr cette tour affligée, du mauuais succez
de leurs affaires, & peu d’espoir qu’ils ont de releuer
le monopole renuersé & aussi pour tascher de dissiper
de son esprit les broüillars de la crainte que luy cause la
prudente affection qu’a nostre Parlement au bien de
l’Estat, la valeur de nos Princes, & le zele de tous les
peuples au seruice du Roy, estant magnifique comme il
est ; sur tout en momeries, jeux, balets & festins, pourueu
qu’ils luy coustent aussi peu que la superbe & enchanteuse
Comedie d’Orphée, qui luy fit produire aux
yeux de la Cour des Seraines appriuoisées de sa main,
& faites à son visage, des Tritons Hongres & Poissons
d’Avril, & autres monstres venus d’Italie à si grands
frais (bien que pour le diuertissement d’vne nuict) que
la France en doit sentir l’incommodité plusieurs années ;
puis que la leuée des deniers pour la paye de nos
armées seruoit de fonds à cette fanfare, & paya la peine
de l’inuenteur, bien qu’elle fust non seulement inutile,
mais honteuse & dommageable à cause de la misere du
temps ; ce bouffon d’Estat, dis-je, s’est aduisé de traitter
à cette My-Caresme sa troupe volante, & les ministres
de ses rapines : Et pour faire voir que rien ne luy est impossible,
apres l’enchantement des principaux Genies
-- 3 --
de la France, qu’ils tiennent sousmis à sa deuotion. Il
a fait par ses charmes que les quatre parties du monde,
les Elemens, & mesme les Enfers ont fourny à ce qu’il
a desiré pour la somptuosité, abondance & rareté de ce
festin, dont il a bien voulu que Paris eust la Relation,
pour luy donner sujet de craindre autant que d’admirer
sa puissance ; la voicy. Lecteur, telle qu’elle m’a esté
donnée. Mais pour ne te laisser pas surprendre à l’estonnement,
i’aime mieux que tu croye que c’est vn mensonge
de mon inuention, pour donner quelque moment
de diuertissement à son esprit ennuyé de la longueur
des miseres de nostre chere Patrie.
A l’abord, la table fut couuerte de six bisques d’Elephans,
six autres de crocodilles seruis en bassins de
fontaine, huict douzaines de herissons en salmigondis,
deux mille rats de Brazil en galimafrée, deux
mille cameleons en capirotades, douze hures de
Lyons en forme de teste de veau, cent pieds d’helan, &
quatre douzaine de langue de centaure en forme de
pieds & langue de mouton : Mais au milieu il fut
posé vn monstre Amphibie au court boüillon, nommé
hypogriphe, enharnaché de beatilles d’Edicts, de
Traittez, de Remises, de Subuentions & supplemens
de haut goust, il estoit timbré d’vne bougette à plusieurs
boursons, & portoit autour du col grand nombre
d’Escussons, ou plustost escarcelles, representant
les armes de Messieurs les conuiez. Ses griffes sembloient
estre incessamment occupées à ramasser autour
de soy grand nombre de differentes pieces d’or &
d’argent, qui estoient mises & separées chacunes en
-- 4 --
leurs appartenances dans ces bougettes. Mais ce qui
fit émérueiller les assistans, c’est de voir que ce monstre
portoit le visage de chacun d’eux en particulier, &
que dans l’entretien quelqu’vn de la compagnie ayant
prononcé le nom de Parlement, le fantosme disparut
à l’instant, ce qui fit auancer le second seruice.
Second seruice.
Il fut seruy soixante Dromadaires bardez en chapons
du Mans ; trente mulets d’Auuergne farcis de
grenoüilles, & lardez de nerfs de bœuf.
Cinquante Reinoceros rotis en guise de cochons de
laict.
Douze porcs-épics auec leur peau & leur soye en
guise de lardons.
Quinze Licornes lardées de viperes auec leur bois
y passerent en dindons.
Soixante Leopards en accolade de lapins de garenne ;
soixante quatre boucs à la Napolitaine.
Troisiesme seruice.
Quatorze cens Hiboux & Chatshuans en plume
pour faisans : soixante mil douzaine de limassons en
broche pour alloüettes. Douze mil douzaines de chauuesouris
grasse pour ortolans. Six vingts renards à la
vinaigrette. Mille Corbeaux en fricassée de poullets,
& six nouzaine de dragons volans à la dodine. Douze
salemandre à la sauce à Robert.
Quatriesme seruice.
Douze cens oiseaux de proye de toutes sortes pour
perdrix, beccasses & gelinottes. Cinquante griffons
lardez de serpens d’Affrique, ayans tous figure de soutraittans.
-- 5 --
Trente douzaines harpies à visage de maltautiers
connus de chacun à la grimouche. Il fut mis au
milieu de la table vn puissant antrepophage chargé de
lauriers, qui seruit seulement de spectacle, personne ny
ayant osé toucher,
Cinquéme sernice de paticerie.
Douze balaines en venaison. Mille douzaines de coquesigruës
en tourtes deux cens cinquante blereaux.
Six cens douzaines de Pigmées qui sortirent tous viuans
de leur paste, & sur la platte forme firent long-temps
figures & postures recreatiues, cependant que
l’vn d’eux ioüoit du flageollet, & apres retournerent
en leur domicile apres auoir hazardé ces messieurs d’assez
bonne grace.
Sixiéme seruice.
Cent douzaines d’œufs d’Autriche à la huguenotte
& à la Portugaise. Soixante tortue du Nil d’effroyable
grendeur, dont les écailles furent presentées à ces Messieurs :
pour faire des Imperialles à leurs carrosses, auec
des cloux d’or à leur entrée à Paris.
Dix milliers de sangsuës des Palus meotides au saupiquet,
portant figure humaine comme les conuiez.
Issues, Ragouts & entremets.
Soixante douzaines de nerfs de bœuf fumez pour
langues.
Cinq mille testicules d’Enuques à la sauce blanche enuoyez
par le grand Seigneur à son Eminence, en reconnoissance
de la continuation de la guerre en la Chrestienté,
dont il a profité sur l’Estat de Venize.
Cinq mille douzaines de cigalles du Iappon pour
anchoies.
Six charettes de sauterelles d’Egypte & hannetons du
Perrou en fricassées.
-- 6 --
Quantité de jambons d’hyposentaures en forme de
jambons de Mayence.
Pour salades.
Douze milles éponges remplies d’or potable prestes
d’estre pressée, qui fit songer à soy vn chacun des assistãs.
Trois cens charettes de noix de Galles confites en vinaigre.
Quatre-vingts plats de chardons de l’Arabie piece
heureuse.
Autant de cigues d’orties & prunelles de canadas pour
oliues.
Il fut serui au milieu de ces plats vn grand bassin de salade
de Gascongne, ce qui fit vn peu murmurer le Partisan
cõme vn mets de mauuais presage, ce qu’estant
apperceu, il fut osté & gardé pour vne autrefois.
Pour le dessert.
Six vingt douzaines de citroüilles de la terre de Promission.
Soixante & douze bassis de gratte culs du Iappon.
Quatre-vingts plats de poires d’angoisses & d’estrangle
vilain.
Six charettes de pommes d’enfer.
Soixante hottées de glands de l’Arabie deserte & douze
charettes d’artichaux sauuages.
A cét incomparable festin il fut seruy au bufet soixante
douzaines de bouteilles de ginguet muscat de Normique.
Deux mille flacons de vin de punellé de la nouuelle
Espagne.
Maluoisie de cornes vertes autant.
Et quatre mille bouteilles de ius de fumier à lambre de
-- 7 --
la mer noire.
Le desert leué on vit paroistre dessus la table & deuant
chacun de ces Messieurs vne seraine nuë chacune sa corne
d’abondance en main, representant le visage au naturel
des belles qui sont honorées de leur entretien à
Paris, qui ietterent à chacun de leurs galands des eaux
& poudres de senteurs, & chanterent des vandeuilles
pour obtenir deux augmentations de leur pension d’amour,
nouueaux carrosses & emmeublemens à leur retour
à Paris.
Ces Dames disparuës l’on seruit la nappe dans vn bassin
à lauer vn grand nombre de testes humaines dont le
spectacle deuoit faire horreur : mais ces Messieurs y trouuerent
de la consolation, voyant que s’estoient celles
de leurs ennemis & sur le doute qu’elles fussent naturelles,
quelques vns y porterent les mains qui les firent
estonner, car ces testes se trouuerent auoir des dents qui
mordirent douloureusement ces curieux, en sorte qu’ils
s’en sentirent longtemps, & puis le tout disparut laissant
de la peur & de la confusion en leur ame.
Et d’autant qu’apres vn si grand repas ils deuoient
auoir besoin de poudre digestiue, il en fut serui dans
vne boëte d’or vermeil, elle estoit composée de cendre
de tonnerre de la poussiere que fait le mouuement du
Zodiaque, & des essieux surquoy roullent les deux polles
faite durant l’esté, auec vn peu de la suye qu’engendre
le feu elementaire au ciel de la lune son voisin, dont
chacun de ces Messieurs les Partisans prit vne cueilliere
plus par curiosité que par necessité, pensant auoir
tous l’estomach aussi chaud que l’Autriche ayant
tant digeré d’or & d’argent depuis que le monopole
-- 8 --
les employe : mais on trauaille à Paris à faire vn vomitif
compost d’Arrest de Parlement, qui leur fera voir
qu’il est indigeste en leur faisant rendre tout. Ce festin
tout à fait acheué, ce grand Chancelier, ou plustost Archibourbe,
pour leur tesmoigner sa science à la magie,
& asseurer leurs esprits par d’autres prodiges plus recreatifs
que les precedens, s’estant saisi d’vne verge enchantée,
il commanda en frappant quelques personnages
representez dans vne tapisserie de descendre pour donner
la Musique à la compagnie, au defaut de celle de la
Chambre du Roy demeurée icy ; tellement que tout
aussi-tost on vid Tiresias se saisir d’vne vieille, Polipheme
d’vne fluste à trois trous, & d’vn petit tabourin, Annibal
de Carthage des cymballes, Geoffroy à la grand
dent d’vne vessie de porc, au bout d’vn baston, & Meluzine
d’vn tambour de Basque, ils firent merueille
auec ces instrumens, y ayant joint leurs voix pour
chanter vne Hymne à la loüange de la Maltoute & de
ses enfans, & sur l’esperance de la voir vn iour refleurir
apres les pretenduës funerailles du Parlemẽt & des Bourgeois
de Paris. Mais ce qui fut trouué admirable, c’est
que l’asne d’Apulée ayant esté appelé à son tour, quitta
la tapisserie pour venir battre la mesure auec sa verge
naturelle, tantost sur l’espaule de l’vn, tantost sur l’espaule
de l’autre ; ce qui fit vn peu rire l’assistance, toutes fois
du bout des dents, se souuenant toûjours des circonstances
de ce festin, où parmi la rare somptuosité ils
auoient remarqué la malice de celuy qui les traittoit,
qui s’estoit joüé d’eux, en leur imprimant la crainte du
sort qu’ils attendoient, dont il ne sera pas exempt luy
mesme, si on luy fait justice.
FIN.