ADVERTISSEMENT
enuoyé aux Prouinces, pour le grand
soulagement du peuple : Sur la Declaration
de Monseigneur le Duc d’Orleans
de Lieutenant General du Roy
par toute la France, Pays, Terres &
Seigneuries de son obeyssance.

CE n’est point à tort & sans cause que l’on
trouue à redire au Gouuernement present
de l’Estat, d’autant qu’estant entre les mains
des ennemis du Roy & de la France, il n’y a pas
lieu de s’en loüer. Ce n’est pas le mesme de ce
regne icy, que celuy des deux Roys HENRY
LE GRAND ET LOVYS LE IVSTE, Pere
& Fils, de memoire immortelle, ausquels on
ne se pouuoit pas plaindre des Ministres qui
conduisoient le Gouuernail de cét Empire Gaulois,
qui estoient tous anciens seruiteurs de leurs
Majestez, lesquels ils maintenoient dans la dignité
de leurs charges, destournant de dessus
leurs testes blanches la disgrace dont vne nuée
de Grands les menaçoit, & les obligeans par
bien faits à mieux faire que iamais ; ce qui leurs
reüssit si bien, que par la continuation de leurs

-- 4 --

bons & salutaires aduis, ils s’acquierent du depuis
la gloire qui leur demeura toûjours de n’estre
pas moins peres du peuple que Roys de
France.

 

Ie ne sçaurois lire la response que la feüe Reyne
Mere Marie de Medicis fit au commancement
de sa Regence, sur les plaintes de quelques-vns,
(qui aymoient le changement) contre ceux
qui alors tenoient les premiers rangs dans le
Conseil, & n’y eust sorte d’artifice que l’on n’employast
pour les perdre, sa Majesté iugeant que
ce seroit chose indigne non seulement de sa generosité,
mais de sa conscience, de sacrifier par
vne espece de bannissement la vieillesse des anciens
seruiteurs ; Les Sieurs de Villeroy, de Sillery,
du President Ieannin & autres grand hommes
d’Estat, à la passion de quelques particuliers,
elle les maintint sagement en leur charges.
Il est facile (disoit-elle lors) de descrier les actions de
ceux qui manient les affaires publiques, tant le nombre
des mal contens & des enuieux du bien d’autruy est
grand & le desir de ceux qui s’ennuyent du repos n’estant
pas moindre. Que se pouuoit il dire de mieux
là dessus & en si peu de mots ? Il est aise de vray ;
pource qu’estant de leurs déportemens, comme
des visages de ces anciens Empereurs, à qui
l’idée du peintre preste la figure qu’il luy plaist,
faute d’en sçauoir la vraye : il ne faut pas estre

-- 5 --

beaucoup ingenieur pour les rendre suspects
aux peuples, qui ne sçachant iamais bien ce qui
se passe, ne craint rien si volontiers que le mal
qu’on luy dit de quelqu’vn.

 

La pluspart des hommes par ie ne sçay qu’elle
malignité naturelle, regardent ordinairement
de trauers le bon-heur d’autruy, se figurans que
le monde n’est bien fait qu’autant qu’il va selon
qu’ils le desirent, comptent entre les desordres
publics tout ce qui ne s’accommode pas à leurs
interests particuliers.

Quelque diuersité de conditions ou de couleur
qui les distingue entre eux, ils se ressemblent
tous en ce poinct que des meilleurs Conseils
que le Roy reçoiue d’autruy rarement en
approuuent ils aucun, s’il n’est moins auantageux
aux peuples qu à leurs desseins : ils n’ont
point d’autre Pierre de Touche en cela que leur
vanité. Si l’vn n’emporte le Benefice qu’il guette
au passage ; si l’autre ne paruient à quelqu’vn
de ces honneurs, de l’esperance desquels il nourrit
la vanité de son ambition ; si celuy-là ne rencontre
la faueur qu’il cherche pour auoir vne
pension sur les menus plaisirs : si cettuy-cy ne
demeure en possession de faire dans l’exercice de
sa charge toutes ces griuelées que la corruption
des mœurs à tournées en coustumes : Bref si chacun
d’eux n’obtient, ou ne fait tout ce qu’il

-- 6 --

poursuit & tout ce qu’il veut, ceux qui gouuernent
gastent les affaires, il en faut mettre en leur
place d’autres qui fassent mieux. Telle est la corruption
du temps d’apresent.

 

C’est ce qu’à fait le Cardinal Mazarin, si-tost
qu’il s’est veu éleué à la dignité de premier Ministre
d’Estat, il chassa du Conseil ceux qu’il sçauoit
cõnoistre son peu ou point de merite, & son
ignorance aux affaires, & retint par deuers luy
ceux desquels il se promettoit d’estre secondé en
ses mauuais desseins de troubler la France, nourrir
la guerre, voller les deniers du Roy & rendre
le peuple miserable, tels qu’estoient Emery,
Seruien, le Tellier, de Lyonne, Galand, Bordier,
Catelan, Chabenac & autres.

Il a tenu à gloire d’obseder l’esprit de la Reyne,
captiuer le Roy & le faire obseruer par ses
confidens Italiens, ennemis de la France & du
peuple, ayant éloigné d’auprés sa Majesté Monsieur
le Chancelier Seguier, Monsieur de Chasteau
Neuf Garde des Sceaux, Monsieur le
Comte de Chauigny, ne luy ayant laissé que
Manchini son nepueu, Botru bouffon & autres
qui ont donné à son esprit telle teinture
qu’ils ont voulu.

Il s’est declaré ouuertement ennemy de la
Maison Royale, des Princes du Sang & des
Cours Souueraines, qu’il a voulu perdre par ses

-- 7 --

trahisons, sans espargner la Ville de Paris, de laquelle
il a depuis long-temps minuté la ruine,
& la fait apres cognoistre en l’attaque que ses
Generaux mercenaires ont faite au Faux Bourg
de S. Anthoine, qui s’en estans rendus maistres
pretendoit en suite auoir la Bastille, le Bouleuard
de la porte sainct Anthoine, l’Arsenal, l’Isle
de Nostre-Dame, le Temple, sainct Martin des
Champs & faire entrer le Roy & luy triomphant,
auec vne puissante armée dans Paris par
les grandes intelligences qu’il y entretenoit, &
reduire cette grande Ville au pillage & en cendres,
mal-heureuse intention de ce tyran estranger
que Dieu a ruiné par le courage de son Altesse
Royale & de Messieurs les Princes, lesquels
ont heureusement fait porter la peine aux entrepreneurs
& executeurs des trahisons Mazarines,
en rompans leurs trouppes & les obligeans
à faire vne retraitte honteuse.

 

Tous ces attentats, conjurations, entreprises
& la retenuë du Roy entre les mains de Mazarin
ennemy de sa Majesté & de l’Estat, ont fait
resoudre son Altesse Royale, Messieurs les Princes
& le Parlement de Paris d’aduiser aux moyẽs
pressants de deliurer le Roy, & de chasser le Mazarin,
pour mettre la France en repos, & l’expedient
meilleur qu’ils ont trouuez.

De declarer Monseigneur le Duc d’Orleans

-- 8 --

Lieutenant General du Roy en France, Terres,
Seigneuries & Païs de son obeïssance.

 

Monsieur le Prince de Condé Generalissime
des Armées.

Monsieur le Duc de Beaufort Gouuerneur
de Paris.

Que commandement sera fait aux Mareschaux
de France, Officiers de la Couronne, Capitaines
& Lieutenans de la Garde du Roy, d’amener
sa Majesté à Paris, à peine d’estre declarez
criminels de leze-Majesté.

Que tous Tresoriers, Receueurs & Officiers
de Finances Comptables produiroient leurs
comptes, & deffense à eux de liurer les deniers
qu’ils ont entre leurs mains à qui que ce soit,
que par les ordres de son Altesse Royale, à peine
de payer deux fois.

Que sadite Altesse Royale leuera des gens de
guerre en nombre suffisant pour aller deliurer le
Roy & l’amener à Paris.

Que l’Arrest du Parlement de Paris, au fait de
cette Declaration, sera enuoyé aux autres Parlement
de France pour s’y conformer & donner
pareils Arrests suiuant la mesme Declaration.

Ce sera icy les moyens d’auoir bien-tost la
paix generale, & la France reuoir le Siecle d’Or
retourné, & tel qu’il estoit sous le regne du Roy
Henry le Grand, qui est sous le bon desir de sadite

-- 9 --

Altesse, & de soulager le peuple de tout son
possible en cette qualité de Lieutenant General
du Roy par toute la France, en faisant s’il
luy plaist faire executer les articles suiuantes :

 

SÇAVOIR.

I. Que les Tailles seroient reduites à neuf millions
de liures, comme elles estoient l’an 1609.
vn an deuant la mort déplorable du deffunct
Roy Henry le Grand, au lieu qu’à present elles
passent cinquante millions de liures.

II. Qu’à cause de la misere du temps, en laquelle
la plus grande partie des Prouinces, les
Bourgs & les Villages sont aujourd’huy abandonnez,
sera donné trois années d’exemption de
Tailles aux Habitans de la Campagne pour leur
donner moyen de se remettre & continuër leur
labourage.

III. Que les Eslections establies depuis ce
temps-là de l’an 1609. és pays d’Estats seront
cassées, & les Officiers d’icelles deuement remboursez
de la Finance qui se trouuera auoir esté
par eux payée aux coffres de sa Maiesté.

IV. Que le nombre desdits Officiers qui augmente
depuis leur establissement au Royaume,
où à present il y a iusques au nombre de douze,
& en aucunes seize ou vingts qui vont à la charge
du public, sera retranché & reduit comme il

-- 10 --

estoit audit an 1609. à la charge de rembourser
les nouueaux des sommes qu’ils monstreront
auoir payées à l’Espargne.

 

V. Que les Intendans de la Iustice qui sont
aux Prouinces seront supprimez suiuant l’Arrest
de la Cour de Parlement de Paris de l’an 1648.

VI. Que tous imposts extraordinaires faits à
l’instance des Partisans, & dont les Patentes
n’auront esté veriffiées aux Cours Souueraines
seront ostez & abolis, comme estans à la charge
du peuple.

VII. Que les Rentes sur la Ville de Paris seront
payées par les quatre quartiers aux Rentiers selon
les Arrests de la Cour, & les Payeurs d’icelles
y contraints par emprisonnement de leurs
personnes.

VIII. Que de toute nouuelle creation d’Offices
ceux qui en traicteront auec le Roy prendront
leurs lettres de prouisions aux parties
Casuelles, auec la quittance de la finance desdits
Offices qu’ils auront payées selon la teneur de
leur contract au Tresorier desdites parties Casuelles,
sans plus mettre les Offices en party ainsi
qu’il se faisoit sous le mesme deffunct Roy Henry
le Grand, sans qu’il soit à l’aduenir besoin
d’aucuns Partisans pour le bien & proffit de sa
Maiesté & de ses sujets.

IX. Que les anciens imposts mis sur le bois

-- 11 --

seront continuez, & les nouueaux abolis, sur
les deniers desquels seront pris les droicts des
Officiers.

 

X. Que les Vendeurs de Vins obserueront
l’Arrest de la Cour de l’an 1648. & ne prendront
que trente sols pour le droict de chacun muid
de Vin vendu.

XI. Que le Sel qui se debite à la Gabelle &
Greniers à Sel, sera le minot deliuré pour vingt-cinq
liures au lieu de trente sept qui se payent
à present.

XII. Que pour la mine de charbon à brusler
ne sera pris pour celuy de la Gréue que vingt-quatre sols,
& celuy de l’Escole vingt-huict sols
comme il se faisoit cy-deuant, outre les frais ordinaires
des mesureurs & porteurs.

XIII. Que les Arrests de la Cour de l’an 1648.
pour le pied forchu sera entretenu & obserué
touchant le droict des Vendeurs sans en prendre
de plus grands, & qu’vn tableau sera mis aux
Bureaux desdits Vendeurs, auquel seront lesdits
Arrests inserez.

XIV. Qu’aux Hostelleries & Tauernes des
grands chemins sera fait vn Reglement de Police
pour la taxe du pain, du vin, de la viande, du
foin & de l’auoine, pour laquelle il y aura vn tableau
en chacune Hostellerie & Tauerne, afin
de remedier aux desordres & aux prix excessifs

-- 12 --

que les Hosteliers & Tauerniers exigent de leurs
Hostes, & qui sont contraints le plus souuent
de se loger aux lieux destournez, éloignez des
grands chemins.

 

XV. Que les Ordonnances de la Police seront
obseruées & executées, & que le Lieutenant
Ciuil Chef de la Police en la Ville de Paris,
rendra toutes les sepmaines compte à la Cour
des diligences qu’il aura faites pour la Police,
à peine d’en respondre en son propre & priué
nom & de suspension de sa charge, que luy ou
ses officiers és iours de marché, se transporteront
és lieux & places des marchez, pour visiter le
bled & la farine, cognoistre le prix de la vente, &
dont il fera son rapport à la Cour, comme
dessus.