COADIVTEVR.

Quoy que vous n’ayez pas finy de cette façon
i’ay voulu vous faire connoistre qu’apres
auoir imité le nombre de vos sentimens diuisez
en neuf Articles & refutez exatement i’ay trouué
à propos de vous exhorter à ne plus mettre au
iour des libelles diffamatoires : ie viens d’en lire
vn intitulé le vray & le faux de Monsieur le Prince
& de Monsieur le Cardinal de Retz, qui est la
mesme doctrine de vostre Esprit de Paix : le dessein
du premier tend à sedition, & le suiet de
l’autre ne dit rien qu’à vostre auantage, quoy
que fort obscur & embroüillé. I’en ay veu d’autres
intitulez, les Intrigues de la Paix, les Contretemps

-- 19 --

de Monsieur de Chauigny premier Ministre
de Monsieur le Prince, la Lettre du Bourgeois
desinteressé &... que ie refuteray, si
vous continuez à mesdire de nos princes, ie demeureray
dans le silence, parce qu’ils sont trop
faux pour estre crus, la refutation se trouue en
eux mesmes, & dans les actions des princes, il
ny a que le [1 mot ill.] & le faux qui contient trois ou
quatre particularitez qui meritent quelque ecclaircissement
que vous auez cachez à la verité :
Vous deuiez estre aussi adroit à cacher celuy qui
distribuoit vostre Esprit de paix, il ne seroit pas
prisonnier au Chastelet, & n’auroit pas auoué
que cette piece luy a esté donnée chez vous,
pour distribuer au public : vne autre fois ne vous
laissés pas surprendre car si Monsieur le Duc
d’Orleans n’auoit pas eu trop de bonté, il deuoit
le faire pendre aussi tost, & vous faire demander
pardon des iniures que vous faites escrire à
vostre plume contre l’honneur de S. A. R. que
vous accusés d’auoir fauorisé le passage du Mazarin
en france. Terribilis in ciuitate homo, linguosus
& temerarius in verbo suo, odibilis erit Eccli. 9.

 

FIN.