PRESAGES DE
Changement en la Monarchie
des François.
C’EST merueille qu’vn Peuple accoustumé
à la seruitude & à la tyrannie
y trouue sa liberté, & qu’il
ne veult point secouer son ioug.
Dieu dit en l’Exode Chapitre 2.
verset 23. Les Enfans d’Israël souspirans
pour la seruitude crierent, & leur
cry monta deuant Dieu pour les charges,
& Chap. 3. Vers. 7. I’ay veu l’affliction de mon Peuple en
Egypte, & ay ouy sa clameur à cause de la rudesse des Commissaires
des Oeuures.
Neantmoins ce Peuple est tellement accoustumé
aux faix & à l’esclauage qu’il ne peut gouster la liberté
que Moyse luy donne par sa conduite : au Chap. 14.
Verset II. Il n’y auoit point par aduanture de Sepulcre en
Egypte, dit-il, pour tant nous as tu amenés affin que nous mourions
au Desert. Qu’est-ce que tu-nous voulu faire en nous retirant
hors d’Egypte ? N’est-ce pas ce que nous te disions en Egypte,
en disant, deporte toy de nous, & nous seruirons aux Egyptiens,
car beaucoup mieux nous valoit seruir à eux que mourir
au Desert.
Vne seconde merueille passe plus auant, que ceux