il y en eut encore vn grand nõbre qui marquerent la iournée par la
perte de la vie. Cependãt que la Mothe pour suiuoit cette caualerie des
ennemis iusques sur la cõtrescarpe du fossé de la Ville, où elle se retiroit,
il fut aduerty que 500. hommes du debris de l’Infanterie des ennemis
auoient forcé vne redoute gardée seulement par 20. hommes des nostres,
& qu’ils s’y estoient logez. Tout aussi-tost il se porta sur le lieu, inuestit
cette redoute, & auec quelque 300. hommes commanda l’attaque, qui
fut faite de toutes parts auec tant de cœur & de resolution, que la barriere
fut d’abord gagnée ; & à mesme temps furent forcez & tous tuez
par cette courageuse Infanterie du Cãp & de la Citadelle. Les fuyards
qui prirent le chemin de la Doüaire, furent suiuis par 200. cheuaux,
qui en arresterent encore trois ou quatre cens par les chemins. Ce combat
fait à diuerses reprises dura pres de cinq heures, & la Mothe montra
par tout son courage & son iugement dans vne égalle assiette.

Voila comme cette bataille est décrite par vn Autheur Frãçois :
les estrangers ne la releuent pas moins. Le Comte Galeazzo
Gualdo Priorato, raporte en l’Histoire de ce temps, que sãs
cette victoire l’armée Françoise auoit resolu de se retirer per la
parte di Vanchia à Borgo di Po. Et cét Historien confesse nettement,
que la France à eu cét auantage par la diligence de Mr de
la Mothe, auquel il remarque les plus hautes qualitez qui se
puissent rencontrer en vn Capitaine ; la diligence, & le iugemẽt
intrepide & temperé dans les confusions & desordres des combats ;
se sont ses termes : Francesi li quali hebbero questa vittoria
fortunatamente, e per diligenza del Signor della Motha[1 lettre ill.], a cui la sorte
concesse nella confusione quella intrepidezza, e temperanza, che pochi
benche prudenti ne sono in casi simili fauoriti.

De vingt-neuf sorties qui furent faites pendant ce siege, il y
en eut vingt-trois du costé de Mr de la Mothe, dont il y a iournal,
& furent toutes vigoureusement repoussées. Mais entre
autres il s’en fit deux les 23. Iuillet & 1. d’Aoust, pour faire sortir
les personnes inutiles de la Ville, auec ce reste de Caualerie
de Dom Carlo de la Gatta qui l’incommodoit, Turin ayant
moins à faire d’hommes que de munitions.

La premiere diminua fort les ennemis, elle commença sur les
dix heures de nuict, que le Prince Thomas du costé des Gardes,
& le Marquis de Leganez aupres du Pô firent des feintes attaques,