Anonyme [1649], L’ENTREVEVË DV SVLTAN HIBRAIM EMPEREVR DES TVRCS ET DV ROY D’ANGLETERRE, AVX CHAMPS ELYSEES. , françaisRéférence RIM : M0_1261. Cote locale : C_4_7.
Le Roy.
Est-il possible que l’on sçache Desia cette action si lasche ? Qui vous a dit si promptement Ce méchant traict d’vn Parlement Dont la main fourbe & parricide C’est soüillé d’vn tel homicide ?
Le Sultan.
Ie confesse qu’il a mal fait, Mais n’est-ce pas vn mesme effet Qui m’a mis dans ces noires ombres, Lieux melancoliques & sombres Où tout obiet est déplaisant, Où le Soleil n’est pas luisant, Où les Estoiles & la Lune Sont d’vne couleur toute brune, Où les ames ont des tourmens Chauds, froids, & sans allegemens.
Le Roy.
Vous ne deuez vous plaindre encore De ce grand feu qui vous deuore, Car il y a fort peu de iours Qu’vn demon vous tient dans ces fours Où la flame qu’il vous appreste Passe bien dessus vostre teste, Car c’est pour vne eternité Que ce feu vous est apresté.
| |||||